لودھراں (تھانہ قریشی والا):
بستی جلے والا، موضع واہی امام بخش میں موٹر سائیکل سوار تین مسلح ڈاکو دن دہاڑے واردات کر کے فرار ہو گئے۔ پہلی واردات میں محرم علی ولد امام بخش اُتیرا سے 87 ہزار روپے نقدی چھین لی گئی۔ متاثرہ شہری ڈاکوؤں کی جانب سے بندوق کی نوک پر لٹ گیا، جبکہ قریبی لوگوں کو کچھ سمجھنے کا موقع تک نہ ملا۔
دوسری واردات میں نوجوان کی حاضر دماغی نے بچا لیا موٹر سائیکل
انہی ڈاکوؤں نے چند لمحے بعد محمد مجاہد نامی نوجوان سے موٹر سائیکل چھیننے کی کوشش کی، مگر مجاہد کی حاضر دماغی نے ان کے ارادے خاک میں ملا دیے۔ اس نے فوری طور پر موٹر سائیکل کی چابی نہر میں پھینک دی جس پر ڈاکو مایوس ہو کر صرف معمولی تشدد کر کے فرار ہوگئے۔
پولیس کا مؤقف:
پولیس تھانہ قریشی والا نے واقعے کی اطلاع پر جائے وقوعہ پہنچ کر تحقیقات کا آغاز کر دیا ہے۔ سی سی ٹی وی فوٹیج، عینی شاہدین اور متاثرین کے بیانات کی روشنی میں ڈاکوؤں کا سراغ لگانے کی کوششیں جاری ہیں۔
عوامی ردعمل:
علاقہ مکینوں میں خوف و ہراس پھیل گیا ہے اور انہوں نے پولیس سے مطالبہ کیا ہے کہ ملزمان کو جلد از جلد گرفتار کر کے علاقے میں امن بحال کیا جائے۔ شہریوں کا کہنا ہے کہ جرائم پیشہ عناصر کے خلاف سخت اقدامات ناگزیر ہو چکے ہیں۔